08/03/2024
Inuussutissarsiorneq ingerlalluartoq inuiaqatigiinnut pingaaruteqaqaaq
Kalaallit Nunaanni ineriartornerup nalitussusaa qanoq uuttuusersorneqarsinnaava, taamaasillunilu ineriartornerup assilis...
Kalaallit Nunaanni atortussanik pilersitsiortornerup kulturikkullu ineriartornerup nalaani suliffeqarfik Inussuk A/S nassaarineqarsinnaavoq, suliffeqarfiup aallussinini takorluukkanilu aallaavigalugit Kalaallit Nunaannut sunniuteqarpoq. V2X Permagreen A/S-illu suleqatigineratigut Inussuk A/S-ip Kalaallit Nunaanni pisuussutsit piginnaasallu atorluarniarpaat illersorniarlugillu, ingammik Pituffik Space Base (PSB) eqqarsaatigalugu. Joint venture una suliniummit ”Greenland First”-imik taaneqartartoq aallaaveqarpoq, tassanilu takorluugaavoq nunaqavissunik atorfinitsitsisoqarnissaa, ilinnialersitsisoqarnissaa kiisalu Kalaallit Nunaanni inuiaqatigiit pitsanngorsaaviginissaat.
Inussuup ingerlallualersimavoq politikkikkut PSB-mi ataavartumik isumaqatigiissusiortoqarnissaanut Kalaallit Nunaat iluanaaruteqarnerunissaa kissaatigineqalersimammat. Takorluugarlu tamanna piviusunngortinneqarpoq Inussuup, tunuliaqutini pitsassuaq, nutaaliorsinnaassutsinilu tunngavigalugu isumaqatigiissusiorfigineqarmat. Suliffeqarfik taamanili isumaqatigiissut aallaavigalugu suliffissanik Kalaallit Nunaanneersunit ingerlanneqarsinnaasunik pilersitsisaqattaalerpoq, nunaqavissullu piginnaasaannik ineriartortitsilerluni. Nunaqavissunik ilinniartitsinissaq, teknikkitigut ilinniagassanik pitsanngorsaaneq sulisullu piginnaasaannik pitsanngorsaaneq aallaavigalugu inuiaqatigiinni ineriartorneq peqataaffigineqarsimavoq.
Inussuk A/S-ittaaq Kalaallit Nunaanni inuussutissarsiorfiit peqataaffiginiarlugit najugaqavissunut niuerniarlunilu suleqateqartarpoq. Tassunga ilaapput pilersuisut nunatsinneersut, taakkunanngalu atuineq aningaasatigut kaaviiaartitseqataallunilu nunaqavissut inuussutissarsiornerannut annertusaavoq.
Suliffeqarfimmi atorfillit amerlanerit ukiorpassuarni Pituffimmi sulisimapput, sumiiffimmilu najugalinnut annertuunik atassuseqalersimallutik, tamannalu kulturikkut avitseqatigiinnissamut aamma periarfissiivoq. Taamannak tunniusimaneq Greenland Heritage Weekeqartitsinikkut takuneqarsinnaavoq, tassani kalaallit kulturiat nersorniarneqartarpoq, assigiinngitsunillu sammisassaqartitsisoqartarluni, soorlu qimusserneq ileqqullu malillugit niuertitsineq. Taamannak suliniuteqartoqarneratigut ataqatigiissuseq annertusarneqartarpoq, kisiannili aamma sulisut akornanni tulluusimaarneq atassuteqarnerlu pilersinneqartarluni.
Pituffik Space Basep ingerlanneqarnera assigiinngitsunik unammilligassartaqarpoq, ingammik issittumi silaannaap pissussaa eqqarsaatigalugu. Inussummilu unammilligassat pilersaarusiorluarnikkut, atuisunik suleqatinillu qanimut suleqatiginninnikkut kiisalu sumiiffimmi silaannaap pissusaanut nukissallu killeqarnerannut ataqqinninnikkut qaangerneqartarput. Issittumi ingerlatsiniarnermi ataqatigiissaarinikkut unammilligassaqaraluaqisoq Inussuup silaannakkut, nukissiornikkut kiassarnikkullu kiffartuussineq ataavartoq tutsuiginartorlu naammassiuartarpaa.
Peqqissutsimut tunngatillugu kiffartuussissutit ingerlatsinerillu napparsimmavimmik atortorissaartumik peqarnikkut naammassineqarpoq, napparsimmavimmi najugallit sulisullu peqqissarneqarsinnaapput. Kalaallit Nunaanni Peqqinnissaqarfimmik taamatut suleqateqarnikkut Inussuup Pituffimmi pitsaasumik inuuneqartoqarnissaanik qulakkeerinninniarnera takuneqarsinnaavoq.
Inussuk A/S-ip ilinniarnerup piginnaasanillu ineriartortitsinermut tunngatillugu aallussinera ilinniarfinnik suleqateqarneratigut takuneqarsinnaavoq. Ilinniarfissatut neqeroorutaasut aallaavigalugit takuneqarsinnaavoq inuusuttut inuttut piginnaasatigullu ineriartortinneqassasut, taakkualu ilinnialersussat Kalaallit Nunaatalu ineriartortinneqarnissaanut pingaaruteqarluinnarput.
Suliffeqarfik teknikkitigut nutaaliorneq periutsinillu nutaanik nassaassarsiorneq aqqutigalugu pitsanngorsarniartuarpoq suliassaqarfitillu annertusarniartuarlugit. Inussuup nutaaliorluni ingerlatsinermini kiffartuussinerminilu pitsanngorsaarniarnerminut atatillugu Pituffimmi qaammataasamut attaveqaateqarnissamut Tusassip suleqatigisimanera takussutissat ilagiinnarpaat.
Inussuk A/S-imut siunissaq qaamaqaaq, suliffeqarfiup naammagisimaarinninnerup ineriartornissallu annertusarnissaanut atuisunik suleqatinillu suleqatiginninneq aallaavigalugu anguniakkat pilersaarutillu annertusarniarpaat. Piginnaanngorsaanermi suleqatigiinnerillu aallaavillit Inussuk Kalaallit Nunaata aningaasatigut inuiaqatigiinnilu ineriartornissaq annertusaaqataaffiginiarpaa.
