11/01/2024
SORAARNERMI NAAPINNEQ: QARASAASIAQ ATORLUGU EQQARSAATERSUUTISSANIK PAASISINNAASOQ
DI Digital-mi branche pisortaa, Camilla Ley Valentin peqatigalugu Sulisitsisut illorsuaani soraarnermi naapisimaarnermut...
Peter Pars A/S ukiuni qulikkaani arlalinni Kalaallit Nunaanni inuussutissarsiornerup iluani pingaarutilittut inissisimavoq. Suliffeqarfik 1965-imi Peter aamma Jensigne Parsimit pilersinneqarpoq. Suliffeqarfiup oqaluttuarisaanera qiviaraanni nutaaliorneq, aallussineq inuiaqatigiinnullu akisussaassuseqarneq takuneqarsinnaapput.
Peter Parsip sakkutuuni sulisariaqarnini naammassigamiuk inuunera allanngorujussuarsimavoq. Nittarsaassani takulersimavaa Ilulissani elektrikerissarsiortoqartoq, taannalu inuunerata ingerlarnanut aallarniutaasimavoq. Peter Danmarkimi el-installatøritut ilinniarnini naammassigamiuk Ilulissanut uteqqippoq, uteramilu suliffeqarfik innaallagissiorfiusoq Peter Pars A/S novembarip aappaat 1965 pilersissimallugu. Suliffeqarfik aallarteqqaarmat atortussat Grønlands Tekniske Organisation (GTO)- mit pisiarineqartarsimapput, sivitsunngitsorli nammineerlutik pilersuinermik aallartitsisimapput. Aappariit Ilulissani najugaqarniarlutik aalajangersimapput, nammineerlutillu illuliorlutillu sannaviliorsimallutik, taakkualu suliffeqarfiup ingerlallualersussap aallarniutigisimavai.
Peter Parsip ernera Jens aamma elektrikerinngorsimavoq, taassumalu suliffeqarfimmi ingerlatsineq 1999-imi elektroineniøritut naammassereerluni tigusimavaa. Kinguaariinnut tulliuttumut ingerlatsineq pilersaarusiorluagaasimavoq, ikaarsaarnissarlu ukiut arfinillit sinnerlugit pilersaarusiaasimalluni, taamaalilluni ikaarsaarneq oqitsumik pisimavoq suliffeqarfiullu pingaartitai ileqquilu nassatariinnarneqarsimallutik. Jensi aqutsilernerminit allannguutit pingaaruteqarluinnartut aallarnisarsimavai, taamaasilluni suliffeqarfimmit suliassat ingerlanneqartalersimapput pilersaarusiorneqartalersimapput titartarneqartalersimallutillu. Taamaaliortoqarneratigut suliassat amerlanerit tiguneqarsinnaalersimapput, tassunga ilanngullugu Ilulissani blokkit qernertut kiisalu Halibut fabrikkip sanaartorneqarnera ingerlanneqarsimallutik.
Peter Pars A/S-ittaaq ingerlaavartumik nukissiorneq ukkatarivaa, suliffeqarfillu Namminersorlutik Oqartussat Avatangiisinut Pinngortitamullu nersornaasiuttagaani ingerlaavartumik nukissiorneq pillugu nersornaasiinermi 2010-mi nersorniarneqarluni. Suliffeqarfittaaq maanna ruujorilerinermik aamma suliaqartarpoq.
Siunissaq eqqarsaatigalugu suliffeqarfik kinguaariit pingajuannut ingerlariaqqinnissaminut periarfissaqarpoq. Jensimmi ernera Nicklas elektrikeritut ilinniarsimavoq, ilaqutariillu suliffeqarfiata ingerlanneqaannarnissaa qulakkeerniarlugu el-installatørinngorniarniarnissani pilersaarutigalugu. Ikaarsaarnissamut Jensip angajoqqaami periuserisimasaat iliuuserisimasaallu iluatsilluarsimasut malinniarlugit aajalangersimavoq.
Peter Pars A/S Ilulissani pingaarutilittut inissisimavoq, inuiaqatigiillu assigiinngitsorpassuartigut tapersersortalugu. Suliffeqarfik ilinniartunik 60-it missaanniittunik naammassititsisimavoq, tamannalu suliffeqarfiinnarmut iluaqutaanani inuiaqatigiinnut iluaqutaalluni. Suliffeqarfik sulisunik avataaneersunik atuinani najugaqarfimmi sulisut atorneqartuarsimapput. Nunaqavissunik ilinniartitsinissaq Jensip annertunerusumik sulissutiginikuuaa, tassami assassugassanik suliaqarsinnaasunik ilinniarsimasunik piginnaasaqaluartunik amigaatigineqartuarmat.
Suliffeqarfittaaq ukiut ingerlanerini kulturikkut timersornikkullu aaqqissuussanut tapersersuisarpoq. Jensip piujuartitsinermik tunngaveqarluni, sulisunik naammagisimaarinniffiusumik ingerlatsilluni kiisalu minguinnerusumik ingerlatsilernissamik ukkataqarluni suliffeqarfiup ingerlateqqinnissaa qilanaarivaa. Atuisut suliffeqarfiullu iluaqutigisinnaasaanik ingerlatsineq Jensip pitsaasuusutut isigaa taamalu ingerlasoqartussaasoralugu.
Peter Pars A/S-ip oqaluttuassartani tulluusimaarnaqisoq siunissamullu takorluukkat ersarissut nassataralugit ingerlaannassaaq, Kalaallit Nunaannilu inuussutissarsiorfimmut pingaarutilittut inissisimaannassalluni.
